到埗後首要辦理 - 電話卡

剛剛抵埗加拿大人生路不熟,不時需要打電話或者上網搵資料,所以第一件事當然要買張電話卡。話說小編友人剛移居到加拿大,最近同小編提及到安頓期間喺當地買電話卡嘅趣事。友人買電話卡時交上相關文件,就可以直接拎到電話卡,踏出咗店門之後先發覺整個過程都無俾過錢,事後發現原來呢種電話卡喺當地叫後付卡(Post-paid card)。



加拿大電話卡主要分2種,預付卡(Pre-paid card)和後付卡(Post-paid card)。


友人所申請嘅後付卡(Post-paid card)係加拿大人較常用嘅月費計劃,同香港一般嘅合約月費計劃相似,會根據您所選嘅計劃每⽉⽀付固定基本費⽤。當然每⽉剩餘嘅通話時間、短訊或數據上網等⽤量唔可以累積到下⼀個⽉。提醒大家加拿大電話費用較香港貴,所以如果使用量超出咗計劃所限,可以要支付龐大嘅費用。


如果平時數據使用量唔多嘅朋友就可以選擇預付卡(Pre-paid card),類似香港嘅儲值卡,視乎你自己嘅習慣增值就可以使用,用幾多扣幾多,不需要與電訊公司簽署長期合約,⾃由度較⼤。


加拿大大型電訊商主要有4間:Bell、Telus、Rogers、Freedom,大型電訊商覆蓋範圍較大,信號相對較好,服務計劃亦較多選擇,但都仲有好多其他嘅供應商,最緊要選擇適合自己嘅服務計劃。每個人需求唔同,要視乎自己居住嘅地區、使用數據流量嘅習慣、個別地區嘅接收情況、價錢等而去決定上邊個台。


小編再次提提大家記得購買電話卡時了解清楚條款,留意有無其他隱藏費用,免得收到帳單先發現咁就喊都無用。如果想穩陣啲到埗後即刻可以上網,大家都可以選擇離港前買定一張電話卡旁身,咁就有充裕嘅時間慢慢揀至適合嘅服務計劃。



33 次查看0 則留言
# 熱門標籤
最新文章