《移民加拿大必睇！卡加利VS多倫多，到底邊度啱您多啲？》

自從卡加利係上年嘅經濟學人智庫 (EIU) 全球最宜居城市年度排名入面排名第三之後，有唔少人對於卡加利呢個嘅加拿大城市都產生咗興趣。而唔少客人都會問我哋關於當地嘅風土人情，適唔適合移民居住同埋點比較其他熱門城市，例如多倫多同溫哥華，卡加利嘅優點喺邊度呢?

如果你哋想移民加拿大，但係唔知應該搬去多倫多定係卡加利？唔緊要，呢篇文章會為你簡單分析兩個城市嘅人口、工作行業、教育、天氣、娛樂等方面嘅資訊，令你可以更清楚了解兩個城市之間嘅特點，最後可以揀選一個最適合你嘅城市發展未來嘅生活。快啲跟住小編嚟探討吓多倫多同卡加利啦！

人口

多倫多人口大約有640萬，由於越來越多新移民定居係多倫多，可以話係加拿大最熱鬧嘅城市。而卡加利人口有大約160萬人，因為近年卡加利經濟發展迅速，就業率高，所以當地人口每年都持續穩定增長約2%。

卡加利曾多次獲評為「世界上最乾淨嘅城市」

就業

多倫多有好多唔同嘅行業，例如金融、傳媒、科技、餐飲等等都有，所以就算一啲比較冷門嘅職業都可以係多倫多搵到工。而卡加利就以能源業為主，其次係科技業同農業，由於當地經濟一直以石油、天然氣及油砂為主業，唔少能量產業相關嘅公司都有係卡加利投放資源，為當地提供大量嘅工作職位。另外由於卡加利華人較少，所以大部份當地華人群組都會互相扶持，搵工方面基本上唔會太難。

教育

多倫多有好多著名大學，例如多倫多大學, 約克大學都係全加拿大頂尖嘅大學，教育資源豐富，入讀門檻都相對上較高。而卡加利嘅大學就少啲，當中最熱門嘅就係卡加利大學，佢哋嘅酒店管理更加係加拿大國內排名最高嘅科目。全卡加利總共有五間大學，提供超過四十個科目俾學生選擇，而且學費都相對上平啲。

天氣

多倫多係位於加拿大湖泊地區，氣侯同香港一樣比較潮濕，冬天平均氣溫係大約攝氏零下五至八度，夏天就平均大約15至25度。

而卡加利位於加拿大阿爾伯塔省南部嘅內陸地區，氣候比較乾燥。卡加利係全加拿大最寒冷嘅城市之一，冬天平均氣溫大約攝氏零下十至十五度，而夏天就平均大約10至23度。卡加利一年四季陽光好充足，平均一年有333日都係晴天，所以好適合去玩戶外活動同欣賞大自然。

當地冬天會間唔中吹起一種暖風叫“chinooks”，可以幾個鐘內將氣溫提高攝氏二十度

娛樂

由於多倫多有好多來由世界各地嘅移民人口，一年四季都有唔同嘅文化活動慶祝唔同嘅文化。加上有好多嘅藝術、音樂、運動等活動，而且啲餐廳、購物中心等嘅選擇都好多，令多倫多成為加拿大旅遊業最興旺嘅城市。而卡加利就以郊野公園、滑雪等戶外活動為主，但係相對上文化、藝術、音樂等就少啲選擇。

多倫多每年都會舉辦例如加勒比嘉年華，唐人街華人節，希臘美食節，多倫多國際電影節等等嘅大型慶典。而卡加利由於人口較少，文化活動雖然無多倫多咁多元化，但係都有各式各樣嘅活動，例如卡加利最出名嘅牛仔節，國際藝術節同埋中秋文化節。

據統計，每年約有140萬遊客和市民參加卡加利牛仔節的活動

總括嚟講，多倫多係一個綜合多元文化嘅國際商業城市，當地有好多唔同行業

嘅就業機會、教育方面嘅配套亦都好齊全，吸引到唔少國際留學生過嚟尋求充滿活力同包容性嘅學習環境。當地亦都有好多華人居住，根據CBC新聞統計，2022年多倫多620萬人口之中就有大約28萬人識普通話(4.5%)同大約27萬人識廣東話(4.3%)。所以作為一個土生土長嘅香港人如果想移民去加拿大，多倫多會係一個比較容易適應嘅落腳點。

卡加利係阿爾伯塔省最大嘅城市，係近年加拿大發展潛力最大嘅城市之一，人口雖然唔多，但係房價比較便宜。天氣方面卡加利雖然係全加拿大最寒冷嘅城市之一, 但係全年卡加利四季分明，陽光充足所以好適合玩户外活動。如果讀者追求寧靜、乾淨、地廣人稀嘅生活環境，咁卡加利應該會係您嘅不二之選。