加拿大移居小知識:發生事故應該打咩電話救助?

移居到加拿大總有大大小小嘅事情需要處理同準備,就等我哋同大家分享一下當地嘅生活小知識,幫助大家盡快熟悉當地嘅生活習慣同文化。


情境題:如果你係加拿大發生事故需要援助嘅時候😖,你應該打咩電話去救助呢?

當然唔係打返999啦!加拿大設有唔同嘅電話熱線去支援當地居民,而以下呢3個電話號碼就一定要記緊啦!


☎️ 911 - 提供緊急援助

911係當你遇上任何緊急情況需要警察🚓、消防部門🚒或護理人員🚑協助時所撥打嘅電話熱線,例如火災、車禍、涉及犯罪如盜竊或任何涉及生命危險既醫療緊急情況等。如果你遇上以上情況,記得保持冷靜並立即打911,向接線員清楚講出所發生嘅事故、地點、你嘅姓名同電話號碼。


☎️ 311 - 提供「非緊急」的市政服務咨詢

311熱線係處理「非緊急」市政服務既中心熱線,每週7日、每日24 小時,為大家提供多種語言嘅協助。你可以尋求與城市服務相關既協助或舉報社區問題,包括噪音投訴、垃圾收集、違例泊車、公共安全問題等。但留意只有部分地區或城市會提供311熱線,例如安省提供311服務熱線有多倫多、荷頓、密西沙加、渥太華等;而其他地區有溫哥華、卡加利、温尼伯等。

多倫多 (Toronto):https://www.toronto.ca/home/311-toronto-at-your-service/

卡加利 (Calgary):https://www.calgary.ca/cfod/csc/311.html

温尼伯 (Winnipeg):https://winnipeg.ca/311/


☎️ 211 - 提供社區服務咨詢

通過撥打211,你可以獲得各種豐富既社區資源,包括社會服務如托兒服務、經濟援助等、醫療保健或相關政府服務。211熱線係免費,而且內容完全保密。每週7日、每日24 小時營運,提供多種語言為你服務。留意番並唔係加拿大所有地方都提供呢項服務,但比較熱門既移居城市例如多倫多、溫哥華、卡加利都設有211熱線,你可以去相應嘅官方網站了解更多社區服務內容。

安省 (Ontario):https://211ontario.ca/

卑詩省 (British Columbia):https://bc211.ca/

亞伯達省 (Alberta):https://ab.211.ca/


💡溫馨提示:千祈唔好咩事都打911,記得先衡量事件嘅緊急性,咁就唔會浪費社會資源啦!

47 次查看0 則留言
# 熱門標籤
最新文章